NVIDIA-ի փոխնախագահ Ռև Լեբարեդյանը նշում է, որ Հայաստանը կլինի աշխարհի լավագույն հինգ երկրների շարքում՝ գերազանցելով նույնիսկ առաջատար Եվրոպական երկրներին։
Երևանում կայացած AI Conf Armenia 2026-ում ելույթ ունենալով՝ Լեբարեդյանը հայտարարեց, որ Firebird AI նախագծի շրջանակներում մինչև տարեվերջ կգործարկվի 50 000 գրաֆիկական պրոցեսոր (GPU): Սա թույլ կտա Հայաստանին գերազանցել նույնիսկ ամենամեծ եվրոպական երկրներին GPU-ների առումով։
«Մենք կարող ենք օգտվել այս առավելությունից և օգուտ բերել աշխարհին: Մենք կարող ենք արտահանել գիտելիքներ, որը մեզ կդարձնի նշանակալի և ցանկալի համաշխարհային հանրության համար: Հայաստանի գոյության և զարգացման միակ հնարավորությունը մեր բնական ռեսուրսի՝ մարդկային ներուժի օգտագործումն է», – իր ելույթում անդրադարձել է Ռև Լեբարեդյանը։
NVIDIA-ի փոխնախագահը նաև ընդգծել է, որ Հայաստանը կարևոր է աշխարհի համար, հարկավոր է գիտակցել, որ մենք պարզապես փոքր երկիր չենք, որը օգնություն և աջակցություն է խնդրում ուրիշներից: Հայաստանը պետք է զարգացնենք իր մտավոր ներուժը՝ աշխարհի լիարժեք մաս դառնալու համար։
AIConfArmenia 2026-ի մասին
AI Conf Armenia 2026-ը արհեստական բանականությանը նվիրված հայկական խոշորագույն համաժողովն է, որն այս տարի չորրորդ անգամ անցկացվում է Երևանի պետական համալսարանում: Միջոցառման նպատակն է նախանշել Հայաստանում տեխնոլոգիական ենթակառուցվածքների զարգացման ու ԱԲ ոլորտի ընդլայնման ապագա ուղղությունները:
Այս տարի Ai Conf 2026 միջազգային միջոցառումն իրականացվում է Երևանի Պետական Համալսարանի, Krisp ընկերության, YerevanN նախագծի և Առաջատար Տեխնոլոգիաների Ձեռնարկությունների Միության (ԱՏՁՄ) համատեղ ջանքերով։
Firebird-ի մասին
Firebird AI-ը Հայաստանի պատմության մեջ ամենամեծ տեխնոլոգիական ներդրումային նախագծերից մեկն է, որն իրականացվում է NVIDIA-ի առաջատար արհեստական բանականության տեխնոլոգիաների հիման վրա: ԱՄՆ-ի արտահանման հատուկ թույլտվությունների շնորհիվ այս նախաձեռնությունը Հայաստանին հնարավորություն է ընձեռում մուտք գործել աշխարհի ժամանակակից սուպեր-համակարգիչների ոլորտ՝ Հայաստանը դարձնելով համաշխարհային արհեստական բանականության քարտեզի մի մաս:
4 մլրդ դոլարը գերազանցող ներդրումներով՝ Firebird AI-ը նպատակ ունի Հայաստանը վերածել տարածաշրջանային և համաշխարհային ԱԲ հանգույցի: Նախագիծն ապահովելու է պետական և մասնավոր հատվածների համար աննախադեպ հզորության հաշվողական ռեսուրսներ՝ նոր հնարավորություններ բացելով տեխնոլոգիական զարգացման, գիտական հետազոտությունների և տեխնոլոգիական աճի ոլորտներում։
